पेरिस जलवायु परिवर्तन समझौताएते अमेरिकाय बिन्गा जना

पेरिस जलवायु परिवर्तन समझौताएते अमेरिकाय बिन्गा जना

 

Source: www.nationalgeographic.com

सेनो:जन सिरमा 2016 रे फ्रांस रेय: राजधानी पेरिस रे जलवायु परिवर्तन समझौता दिसुम को ताला रे होबा लेना. मेनदो अमेरिका रे राष्ट्रपति श्री ट्रम्प बईजन चि अमेरिका ने समझौता के का मनातिंग मेनते घोषणा केदा.

ने घोषणा ते पेरिस जलवायु (होयो-दा-अ) समझौता मियद लेकाते का सफल दाड़ीजन लेका ठो रो-ओ तना.हालाँकि एट: सोबेन दिसुम को पेरिस समझौता के मनातिंङ-ए रेय: को मोने कदा मेनदो चिय:-चि अमेरिका होयो-दा-अ उवल रे पुर:-पुर: अयर मेनाइ-या अद् पर्यावरण बंचाव मेनते-यो इसु देंगा कोय ओमे ताइना ऐनाते, बेगर अमेरिका लो-ओ-ते पर्यावरण बंचाव रेय: काजी-कमि को मजा लेकाते का पूरा दाड़ियोःवा.

पर्यावरण रेय: मुद्दा ने सोमोय रे इसु पुर: मरंग सोंकोटो रेय: काजी बइया कना. बरिया विश्वयुद्ध होबजन तयोम ते दिसुम को ताला रे उन्नति ओड़ो: केटे: बइन रेय: दपरदाड़ी एटे: जना. अबु भारत दिसुमो एन दपरदाड़ी रे आजाद जन लो-ओ गे अड़गू जना. प्रथम पंचवर्षीय योजना चबा जन लो:गे द्वितीय पंचवर्षीय रे कल-कारखाना के भारतीय अर्थव्यवस्था रेय: मुख्य शक्ति को बाई केदा. गोटा भारत दिसुम रे कारखाना रेय: जालोम को पेरे: एटे: केदा.

एन दीपलाङ HEC लेकन माराङ कारखाना को अबु मुंडा दिसुम हटिया हतु रेको बइ केदा. हटिया जप: इसु हतु कोर: ओते को सरकाराए ओता केदा. एनलेकागे इसु पुर: वीर दरू को बाटी केदा. ने लेका दरू को चबा इदी जना, कारखाना रेय: सुकुल कोते ओड़ो: मोटोर रेय: सुकुल कोते गोटा ओते दिसुम रेय: होयो को बगड़ाव जना. सिरमा रे सुकुल, दुदुगर को पुर:जन ते ओते दिसुम लोलो इदियो: तना. ने ओते लोलो ते ध्रुव कोरे दलोबाकन बरफ (रतन) बुरु को दा-अ बाईयो: तना अद दा-अ को समुद्र रे जमा संगियो: तन ते समुद्र पुर: पेरेगो: तना. समुद्र ताला रे हुपूड़िङ् टापू को दा-अ ते तोपा-ओ तना. समुद्र गेना कोरे मपरंग होयो दुदुगर कोते इसु पुर: नुकसान को जनव सिरमा होबा कतेयो: तना ओड़ो: अबु दिसुम रेयो होयो-दा-अ ओड़ो: जरगी-जेते-रबंग रेय: समय को बदलियो: तना. ने लेकन सोंकोटो को सनामंग तेब: कन रे जलवायु परिवर्तन केसेद मेनते पेरिस समझौता लेकन काजी कोको बपाई केना. नेया: को मनोवा होन को ने धरती रे बंचाव नंगेन इसु दरकार मेनागा.

अबु भारत दिसुम पेरिस समझौता के मनातिंग रेय: केटे: मोने डीड़ी कदा-ए मेंदो इसु पुर: बीर बुरु को उतुड़ूँ रेय: काजी कमि कोयो जुलुंग ते ससेन तन गेया. मपरंग कारखाना ओड़ो: डैम को तोल-बई रेय: कमि जनव ससेन तना. भारत रेय: किसंड़ लागिन कारखाना कोर:यो जरुरत मेन:, मेंदो भारत सरकार के हुडिंग संसाधन रे पूर: विकास रेय: होरा दँड़ा लगातिंअ.

अबु मुंडा पुरखा को ने लेकन होयो-दा-अ ओअलो: लेकन काजी कोते पुर:गे चिर्गल को तइन केना. ना-अए ते-रे योगे अबु मुंडा को बीर-बुरु, गाड़ा ओड़ो: हतु बंचाव मेनते सरकार लो-ओ तेबू लड़ाई तना. सेनो: जन सिरमा CNT/SPT कानून को बंचाव रेय: लड़ाई को एनकन लड़ाई कोगे तईकेना. ने लेकाते अबुवा: लड़ाई अबु बारी बंचाव मेनते दो का मेनदो ओते दिसुम रेन सोबन जीव-जंतु ओड़ो: ओते दिसुम के बंचाव रेय: लड़ाई तन-अ. इसु रसिका रेय: काजी चि ओकोन काजी कमि कोते दिसुम रेन किसंड़ दिसुम को होयो दा-अ को मैला केदा एन होयो दा-अ के अबु रेंगे:-रबंङ होड़ो को बंचाव मेनते बू जुलुङ तना.

तिसीङ कारे गपा भारत ओड़ो: ओते दिसुम रेन किसाड़ाँन सरकार ओड़ो: होड़ो को ने अबु होरा रे हिजू:गी होबा कोवा, कारेदो इदुतम ने ओते-दिसुमायते सोबेन जीव जंतु को चबा उतारोगाको. मेंदो अमेरिका चाहे भारत दिसुम रे सरकार कोय-ते ओते दिसुम बंचाव रेय: असरा समां गेया. अबु केगे ओते बंचाव रेय: लड़ाई के का होका लगातिङअ अद् एन-साथ गे अबुवा: ससंकिर, जगर, दुरंङ-सुसुन ओड़ो: पड़हा-पीड़ कोयो बू सोतो:संगोमेका, एंडे रे नङ मुंडा जाति ओड़ो: बीर-बुरु, दरू-दिरी, गाड़ा दा-अ बंचाव तन लो-ओ ओते दिसुम बू बंचाव दा.ड़िया.

जोहार!